4/Xz24ats5R7xAaRipEX9QEmpZQUx2_Ilo052ZAX7SWls د. احمد الخطيب /️50 كبسولة في طب الأطفال هايفيدوكي جدا لكل اب او ام

الاثنين، 20 مارس، 2017

د. احمد الخطيب /️50 كبسولة في طب الأطفال هايفيدوكي جدا لكل اب او ام

❤️50 كبسولة في طب الأطفال !❤️

١. مترَضّعيش صناعى.

٢. حطّى ابنك على الثدى أول ما يتولد ، لو نايم صحيه ، الحلمه ف الفم ، السرسوب هينزل واحده واحده ،لبنك منزلش ؟ نزل ومش كتير ؟؟ اشربي ٣ لتر سوايل ، خدى موتيليوم وهربانا ،،، ،،لأ متديش أعشاب ، ولا صناعى ، ولا جلوكوز..!

٣. مترضعيش صناعى إلا لو لا قدر الله في إيدز أو سُلّ نشط ، علاج كيماوى ، أو دوا مضطره تمشي عليه ولازم ينزل في اللبن ويضر البيبي..!

٤. ابنك بيمغّص ؟ بيزنّ؟ بيعيط ؟ مش بينيمك ؟ عنده انتفاخات وكمان ب"يقشط"؟
كرعتيه مرتين وسط وبعد الرضعه؟ نيمتيه ٤٥ درجه ؟ استخدمتى سايميثيكون أو دنتينوكس؟ اتأكدتى ان الحلمة "بالكامل" جوا "بؤه"  ومش بيرضع "هَوَا" يملا بطنه؟؟
عملتى كل ده ولسه بيحزق جامد أوى وكمان معاه تسلخات ؟؟
ساعتها نفكر في حساسية لبن ،، والدكتور اللى يشخص مش انتى..!

٥. متأڤوريش في تشخيص حساسية اللبن 😓.

٦. متديش كالسيوم ولا ڤيتامينات عالفاضي.!

٧. #من_غير_روشتة..!

ادى ڤي دروب من أول يوم ٤ نقط ، حديد من الشهر السادس ٧ ملجم ، وكملى بيهم لسن سنتين ، ادى ڤيتامين أ(أ-ڤيتون) ٤ كبسولات -جرعه واحده دفعه واحده- عند سن سنة ونص وكل ٦ شهور جرعه كمان لغاية خمس سنوات ،، لأ مش محتاجين   كالسيوم أصلاً ،، أمال لبنك بيعمل إيه😱😱

٨. التسنين مش محتاج كالسيوم زياده ..!

٩. التسنين مبيرفعش الحرارة بشكل مستمر ، ولا بيعمل إسهال ولا ترجيع متكرر ،، ولا هوا السبب في الرشح بتاع ابنك ،، ولا هوا اللى قتل رفاعى الدسوقى😂

١٠. جدول لإدخال الأكل :

الأسبوع التانى من الشهر الرابع ،، نبدأ بالرزّ ، مسلوق مهروس كويس متخفف في اللبن (الثدى أو الصناعى) ،، كمية صغيرة ( ٣-٥ معالق ) ،، كمان ممكن ندّى الذرة ، القمح ،، بنفس الطريقة ،،
نكمل كده لغاية ٦ شهور ،، بعد كده ،، البطاطس ، البطاطا ، الجزر ، الكوسه ،، ونعمل منهم شوربة خضار مهروسه كويس ،، الفواكه  زى الموز، التفاح ، المشمش ، الكمثرى ،، بتدخل بعد الخضار،، نخلى بالنا عشان طعمها مسكّر فالطفل يرفض الخضروات ،،بعد كده على الشهر التامن ندخل الفراخ ، اللحمه ، السمك ،، متقطع "نثاير" ومهروس كويس واحده واحده لغاية العاشر ،،
ناخد بالنا كل نوع أكل يدخل لوحده ٣ أيام عشان لو فيه تحسسّ او "تقيل" على الطفل .

١١. منتجات الألبان (الزبادى والجبنة) بتدخل من الرابع للسادس ب#شروط..:

*#تحت اشراف الطبيب الخاص.
*#عدم وجود اكزيما مزمنة او اعراض او شكّ فى حساسية لبن.
*#بعد ادخال الخضروات و"تقبّل" الطفل للأكل أصلاً.
ولأ ،، مبتجيبش سُكّر أطفال ،، ولا حساسية ..!

١٢. ابنك اللى مبياكلش متغصبيش عليه ..!

١٣. ابنك اللى مبياكلش انتى السبب على فكره ،، مش عودتيه ع الكاندى وشيبسي وبيبسي وكيندر؟ ،، مش مدخلتيش الأكل بدرى واتأخرتى لبعد السنة؟ مش كل ما تجربى أكله جديده و"يتفّها" بتزهقى ؟-لازم تجربي ١٤ مرة- ،، مش نسيتى تدى الحديد فجاله انيميا وفقدان شهيه؟؟!!

١٤. بنتك اللى مش بتاكل ،، وكل اما تاكل ترجّع ووزنها ضايع ،، ومش عندها أمراض متكررة واضحة ،، دى محتاجه كشف محترم ، مينفعلوش سؤال عالفيس أو كشف طيارى ،، أمراض "مختفية" زى القلب والكلى والجهاز الهضمى والأعصاب مسئولة ،، مننساش حساسيات الطعام مُتّهمه بشدّة..!

١٥. #ابنك_سِخن ،،؟

خففتى الهدوم ، وقلعتيه ؟ حمّيتيه ؟ فتحتى الشبابيك وهويتي البيت ؟ لسه سخن ؟ اديتي سيتال من عمر يوم ، و بروفين من السادس ، ودولفين من ٥ سنين ؟؟ لسه سخن ؟؟ صبرتى يومين ؟ مش قادره عشان الحرارة بتعلى كل ٤ ساعات ؟ انزلى اكشفى فوراٌ !

١٦. #ابنك_سخن؟؟

٩٠٪ أسباب ڤيروسية مش محتاجه مضاد حيوى ،، مننساش التهاب الحلق المشهور(هربس) وعلاجه مضاد ڤيروسي(زوڤيراكس) وتشخيصه صعب جداً ولازم دكتور شاطر ،،

١٧. مننساش المفاتيح دي:

#حرارة +

*حيل(غدد) ورفض أكل وصديد >> التهاب حلق
*ألم جانب البطن ووجع اثناء التبول> التهاب بول
*ألم في الأذن وزنّ ووجع مع الضغط> التهاب اذن
*برد ورشح أصفر وحرارة> ٣٩ >> جيوب انفيه
*ترجيع وألم بطن دورى متكرر> حمى بحر ابيض
*إسهال ورائحة سيئة >> نزلة معوية
*كحة ونهجان صدر >> التهاب رئوى.!

١٨. مش مقبول يبقى النوز سايبه على طول😪 ..!

١٩. لو النوز سايبه دايماً ، او مسدوده دايماً ، أو في هرش ، خنفره ، شخير ، عطس ، كحة ليلية بشكل مزمن مع صوت"ابتلاع بلغم"..
التشخيص غالباً #حساسية_أنف..!

٢٠. (٨٨٪) من حالات حساسية الصدر اكتشفوا ان سببها أصلاً افرازات (خلف-الأنف) وانها بتتحسن تماما على بخاخات نازونكس للأنف.!

٢١. علاج حساسية الأنف مبيقفش .!

٢٢. حساسية الأنف يعنى طفل أنفه حساسه ل"مُثير معين " قدامك حل من اتنين ،، يا نبعد عن المُثير(تراب ، عتة فراش، دخان ، حبوب لقاح) ،، مع اعطاء المسكنات (نازونكس وتلفاست) ،، يا نحدد المثير ونعالج بالأمصال ..
#خلصانه_بشياكة..!

٢٣. طفلك اللى بيكحّ ، وبينهج ، وصدره"بيزيق" ،، بشكل متكرر ،، دي حساسية صدر والعلاج مش شرب ولا لبوس ولا إبر ،، العلاج بخاخات وجلسات ونظام عالمى GINA .!

٢٤. معقولة لسه معرفتيش ان أسباب الكحة من الصدر نفسه (حساسية ، التهاب) يا حاجة "نازلة" على الصدر (بلغم من حساسية الأنف) ، يا حاجة طالعه للصدر (ارتجاع من المرئ) ،، يا حاجة ضاغطة على الصدر ( أورام وأكياس ولاديه) ،، يا حاجة ملهاش علاقة بالصدر(مشاكل الحلق والقصبة الهوائية والحنجره)..😧😧😧!

٢٥. أعطنى بخاخ أنف وبخاخ صدر وهواء نظيف وسأقضى لك على نصف أسباب الكحة في العالم.

#المهاتما_خطيب😂

٢٦. مش كل ترجيع أنتينال !

٢٧. الترجيع(القئ) ممكن يكون زيادة رضاعه او أكل ، اندفاع لبن ، التهاب ڤيروسي(برد) في المعده ، جزء من نزلة معوية(لو معاه اسهال محترم) ، بلغم نازل من الانف على جدار المعده(التهاب جيوب انفيه)،التهاب مخ (بينطُر للأمام مع تغير الوعى) ،، ارتجاع ، حساسية طعام ، أو أمراض جراحية أو  صداع نصفى أو تمثيل غذائى ،، شفتوا بأه ان مش كل ترجيع انتينال😭

٢٨. القئ الخطير هوا المستمر ، المندفع ، اللى معاه دم ، اللى معاه تغير وعى (اغماء ، توهان ، تشنجات) ،، في الحالة دى نوقف الترجيع فوراً بامبول دانسيت او زوفران ونكشف فوراً.

٢٩. الإسهال = محلول جفاف ،، غير كده شكليات 😂

٣٠. الإسهال معناه حمام زيادة في الكمية أو في الليونة ،، معظم حالاته بتبقى نزلات معوية اميبية او ڤيروسية ونادراً بكتيرية ،، المعظم بيتحسن على نيتازود وسلفوزنك ،، المشكلة لو طوّل فوق ١٠-١٤ يوم!

٣١. لو الاسهال طوّل فوق ١٤ يوم ،، بيبقى حساسية لاكتوز ، تكاثر ميكروبى ، طفيل رخم زي جيارديا ،، حساسية طعام (لبن-قمح-غيرها)..
ساعتها بنوقف منتجات الالبان وندى لبن خالي لاكتوز مع اكياس لاكتيول فورت،، والمتابعه مع الدكتور..!

٣٢.   الإمساك مش معناه ان ابنك يطلع مدمن لبوس جلسرين أحاجّه 😂

٣٣. عنده إمساك ؟؟ متأكده انك بتشربي سوايل كويس ؟ وهوا بيرضع كويس ؟؟ زودتى المياه ليه ؟ لو فوق ٦ شهور اديتي عصير برتقال وقراصيا ؟ لسه؟؟ اديتي دوفالاك وبيكولاكس ؟ لسه ؟؟
كده نفحص الشرج عشان الشرخ ،، ونفكر في حساسية لبن وأطعمه ..!
أسباب تانية زى نقص الدرقيه و كسل القولون نحطها في بالنا 👍

٣٤. لو بنغيّر بسرعه مستحيل نشوف تسلخات.!

٣٥. التسلخات مشكلتها جلد حساس شويتين مع تأخير في تغيير الحفاضة ، امهات كتير بتغير البراز Stool بسرعه وبتتأخر في البول ، نستخدم ملطفات جلد مليانه زنك زى زنك اوليڤ وسودو والرهيب سيباميد ،، الڤازلين المستورد وميبو-اه بتاع الحروق ده- كويسين جداً لو الجلد متاكل ،، كريمات للفطريات والكورتيزون بتستخدم تحت اشراف الطبيب ،، اوقات بيبقى تغيير نوع الحفاضة او الحجم الاوسع او بيبي كيلوت أفضل ،، لو التسلخات مستمرة ممكن تبقى إكزيما حساسية طعام (لبن أو غيره) ،، أو صدفيه..!!

٣٦. متديش أنتى بيوتك من نفسك 😡

٣٧. متديش انتى بيوتك أصلاً 😂

٣٨. متدّيش مضاد  أقل من ٧ ايام الا زثروماكس ٣-٥ 👍
التهابات الحلق ٧
الجيوب الانفية ١٠
المسالك البولية ٥-١٠
التهابات المخ ١٤-٢١
الصدر ٧-١٠

٣٩.  مفاصله بتوجعه ؟؟

عملتى سرعة ترسيب ؟؟ ASOT ؟؟ عاليين ؟؟
مبروك ،، 😁 كل ده لوحده مالوش لازمه في التشخيص وللأسف كنتى بتدّى بنسلين على الفاضى !!
لازم ولا بد وحتماً يكون فيه "التهاب" مفاصل متنقل من مفصل لآخر أو القلب مصاب أو حركات لا إرادية مفاجئة أو طفح جلدي أحمر الأطراف أو عقد تحت الجلد فوق المفاصل ( نادرة جدا).. لو ولا حاجه من الّى فاتوا موجوده يبقى مش حمى روماتيزمية قولاً واحداً ..!

٤٠.  ابنك  متأخر في القعود او المشي او الحركة بشكل عام ؟؟ ادّيتى كالسيوم وڤيتامين د بجرعات عالية ومجابش نتيجة ؟؟ 
خلّى بالك ممكن يكون السبب ضمور في المخ أو الأعصاب أو العضلات ،، مش كل حاجة كالسيوم 😤

٤١. متدّيش كالسيوم .

٤٢. متدّيش كالسيوم إلا لو في نقص موثق بالتحاليل أو تشنجات قي اليد والقدم أو اختناق أو حساسية لبن محتاجه جرعات وقائية.

٤٣. ابنك اللى كل شوية يتخبط في دماغه او يقع عليها متقلقيش الا لو #تغير_الوعى(اغماء-عياط هستيرى-نوم مستمر) أو #رجّع_باندفاع أو #اتشنّج ،، غير كده تابعيه ٢٤ ساعه لو حصل أى حاجة من دول ، كشف مخ واعصاب و آشعة مقطعية فوراً✋

٤٤. التهاب الحلق بيتكررّ ؟؟

اديتى المضاد المضبوط ، بجرعات مضبوطه ، لمدة مضبوطه ؟
لسة بيتكرر ؟؟
عملتى مسحة من الحلق ومزرعة واتاكدتى انه مش حامل للميكروب Carrier ،، ؟
لسه؟
اتأكدتى انه مش عنده حساسية أنف والافرازات بتنزل على الحلق "تلهبه" كل شوية؟؟
عالجتيها ؟
لسه بيتكررّ ،،؟
ساعتها نشيل اللوز ب#شروط عند الدكتور ..!

٤٥.  #روشتة_عامة_لتقوية_المناعه:

*برونكوڤاكسوم أكياس ، كيس على ربع كوب عصير صباحا على الريق لمدة ١٠ أيام من كل شهر ،، تكرر ٣ اشهر متتالية (ندى ١٠ ايام ونريح ٢٠)👍
*تطعيم PCV13 .
* ڤيدروب نصف قطارة يومياً لمدة شهر.
* كوب موز باللبن صباحاً.
* نوم جيد متوازن وإيقاف السهر تماماً.
* ألعاب كالسباحة والجرى .

٤٦. ابنك اللى عدى الخمس سنين ده ولسه "بيعمل على نفسه ميّه" بالليل ،احتويه ، منشربش مياه قبل ما ننام وندخل الحمام بعدها بساعتين ، وندى جوايز يوم ما يمسك نفسه ، واياكى تلوميه ،، هوبّ دابل كيك كل ده ميجيبش نتيجة ويتحسن على اميبرامين ويوريبان !! 😂
تمام تمام👍

٤٧. التشنج الحرارى متقلقيش منه خالص طالما اقل من ١٥ دقيقة ،، في الجسم كله(مش ناحيه واحده) ،،  والعمر من ٩ شهور لخمس سنين ،،
مطلوب من حضرتك تنزلى الطفل على الأرض وتسيبيه ،، "هيفُكّ" لوحده ..!
وطبعاً تكشفى ..!

٤٨.لزملائى الصيادلة :

كل الاحترام والتقدير لكل صيدلي شاطر ،، بيراجع الروشته صح حتى لو ضغط شغل ،مش بيوقف في الصيدلية الا دكتور صيدلي ،، بيرجع للدكتور لو خطه وحش -وده الأغلب 😭- ، مش بيصرف دوا الا لو متأكد منه ،، بيوفّر البدايل المظبوطه ،، مش بيشكك العيان في الدوا بدون علم ،، بيصحح الجرعات للدكتور بعلم ،، واثق في نفسه وفاهم شغله ،، مش بيقول كلام في الهوا زى المضاد تقيل ، الدوا كتير ، الدكتور صغير مش كبير 😂

زى ما في صيادلة مستواهم متواضع في صيادلة أشطر من دكاترة والله  وشفتهم كتير وبحب اتعامل معاهم جداً 👍

٤٩.  لزمايلي الدكاترة :

مفيش حاجة اسمها مطهر حلق ، او مضاد حيوى خفيف عشان التهاب حلق خفيف ، مفيش ربطة للسرة عند المولود، مفيش حاجه اسمها مضاد ينشّف البلغم ، مفيش حاجة اسمها ابر ومضاد لعلاج الحساسية ، مفيش حاجه اسمها ابنك عنده حساسية لبن من غير ما تبقى بتعرف تشخصها صح ١٠٠٪ وتعالجها صح ١٠٠٪ ، مفيش تحاليل دقيقة ١٠٠٪ لحساسية اللبن زى المنع والإدخال ،،
مفيش حاجة اسمها "نكحت" الصديد ولا "نشقّ" السِنّه عشان تطلع ، مفيش حاجه اسمها "لنضه نيون" للصفرا ، ولا نوقف لبن الأم عشان البيبي عنده صفرا الا ف حالات نادرة جداً ،، مفيش حاجة اسمها منتجات ألبان بعد السنة خلاص العالم كله بيتكلم على قبل السنة، مفيش حاجة اسمها فاتح شهية ، ولا طفل زنّان من غير سبب ، مفيش حاجه اسمها تغلط في الدكتور اللي قبلك ، قول مختلف معاه ومتقولش مبيفهمش ، احفظ احترامه يتحفظ ليك احترامك ،، لو روشته كويسه متغيرهاش وقول للأهل يصبروا مش لازم تحط التاتش بتاعك ،،
حوّل الحالة اللى مش عارفها انتا مش مستر إكس!
لو جالك تشخيص جديد مش عارفه متسفّهش منه يمكن انتا مش Updated
تواصل مع الدكاتره في التخصصات المختلفة واعرف الجديد وتابع حالتك للآخر ،،
صدقنى ،، هتستفيد وهتفيد العيان وأهله هيحترموك و يدعولك ،،
اعرف ان كل كلمة منّك بتتسجّل عند ربنا ، وهتتحاسب عليها فاتق الله في العيان وخاف عليه زى ابنك او بنتك ..

.
٥٠. للأمهات :

مامى معانا ولسه متعرفيش ان الطفل بيتابع الحاجات بعينه عالشهر التانى ، بيضحك على الثالث ، بيثبت راسه على الرابع ، بيزق الأرض برجله عالخامس،، بيتقلب عالسادس ، بيقعد تماماً عالتاسع ،، بيقول كلمة او اتنين على السنة الأولى؟؟
بيتأثر منك بالكلمة والهمسه واللمسه ،،
بيلقط منك الحنية زى ما بيلقط العصبية ..
كلامك معاه واهتمامك بيه وبعده عن ال TV بيقلل من التوحد اللى من اعراضه تأخر الكلام مع اللعب المنفرد والتركيز على لعبه واحده وحركة متكررة وصعب جداً يركز عينك في عينيه ..
بيفرح لفرحك وبيحزن لحزنك وبيتعب لتعبك ليه ،،
ربنا بيدخلك الجنة بحسن تربيتك ليه ..
و بيدعيلك ولدٌ صالح يدعو ليه ..
وبيتأثر لما يلاقى
بيت العيلة الحب ماليه..!

معقول هتقرى الموضوع ده من غير ما تشيريه 😧❤

#شير..❤

د.احمد الخطيب

0 التعليقات:

إرسال تعليق